K.H AMBO DALLE

Narimunrinna ritu, makkedai Puang Allah Taala : (De’ Upancajiwi Jingnge nenniya taue sangngadina kuammengi pada nasampaka). Surah Adz-Dzariyat.

Jaji tungke-tungke tau de-E nasompai Puanna saisai ritu tau pasiya-sayai ancajingenna nenniya tau massakkarengi pappenyameng riwerengengngi  ri Puanna. Jaji pakkasiwiyangnge saisa toi tanra asukkurukeng ripappenyameng nappenyangengengnge Puangnge rikkeng ataE, tanniya tanra akkatan gemmi simata-mata. Nasaba rikasiwiyangi tenri kasiwiyangi napuatakina. Sibawa sitonget-tongenna de’to na’guna pakasiwi yangi pada toha aderenna nappesukkara’ adorakangnge ripuangnge.

MakkedaE rihaddise KudsiE :.

Hal. 2

Bettuanna : E Atakku ! benneng majeppu toriolomu nennia torimonrimmu bangsa tauE nennia bangsa jengngE engkai pada sewwaE tau maraja tau’E atinna pura de’to napencengiwi akkarungkku cikalice’

Makkumatoiro narekko de’nakkasiwiyang ataE ripuanna de’na nakurangi akkarungenna ritu.

Makkedai rihaddise kudsiE :

Bettuanna : E Atakku ! bennengnge majeppu toriolomu nenniya torimonrimmu bangsa tauE nenniya bangsa jingnge engkai maserro ja’maneng atinna de’lalo nakurungekku cikalice.

Jaji de’laing sitonget-tongenna na’gunai nenniya makkegunaiwi pakkasiwi yangnge sangadinna ataE tomiha simata-mata.

Makkedai Puang Allah Taala ri haddise’ kudsiyE.                                                                                         

 Bettuanna : E Atakku ! majeppu sitonget-tongennu  sining amala’mu ikomaneng mua punnaiwi upara kaiyangemmo bawang. Jaji nigi-nigi lolongeng.

Hal. 3

Deceng sibole-bolena nappuji ri puang Allah Taala. Nanigi-nigi lolongeng rilannaE decengnge aji naengka natunra-tunrai sangadinna alenamiha.

Ponco’na ada nawajiki sisengi tungke-tungke ataE majeppu tuntu-I puasengnge appakatang Ale (assompa) ripuangnge sare kuammengi napa’dupai akkatangenna nennia napassilennerengi asukkurukengngE ripappenyameng riwerengengngi ri puanna.

Jaji narimakkuannanaro nauengkana marennu pannessai rilalenna iyaEwe karangeng maponcoE namarippe’ lao-laona appakatang ale nenniya pappe jeppuE ripuang sewwaE. Nauasenni ritu :

Ada tongeng : “ Ri anessanna pappejeppuE ripuang mappancajie.

                     . Namammure mapabbarakkai puang Allah Taala nenniya napakkegunai risining to’bacaengngi iyaewe karangangnge koromaE sining tuntuengngi lao-laona appassewangnge nenniya pappejeppue kuaetopa arengerangnge ripuang Allah Taala sare kuammengi napulabai asalamakeng.

Hal. 4

            SukkuE manpekeng mannenuangngE riduae wanua lino ahera.

Hal. 5

Sewwa Passaleng

Rilaleng anessanna puasengnge akketangeng majeppu puasengnge akkatangeng iyanaritu assampaE ripuang Allah Taala nasaba atturu’ riparentana nenniya annini’ ripappesangkana.

            Makkedai puang Allah Taala ri surah Al-Baqarahy 21 :

Bettuannna : Hai sininna tauE pada sompai puammu puang pancajiekko nenniya pancajiengngi toriolomu namuareko mennang muparajaiwi tau’mu.

Jaji waji-I riiyamanenne tauE massompa ripuanna atturu’ ri parentana nenniya annini’ ripappesang kana naengka pada mancaji tomaraja tau.

Hal. 6

Najeppu tomaraja tauE ripuanna, ri werengengi kuritu apatirowang makkedai puang Allah Taala ri surah Al-Anfal 29 :

Bettuanna : Narekko muparajai tau’mu ri Puang Allah Taala, napancajingekko mennang sewwa lajang Papassarang pallawangenna tongengngE nasalaE, maja’E namadecengngE.

            Aga namalomona napapole (napasilennereng) rupa-rupanna pakkasiwiyangngE lahereng enrengngE topa bateng. Najeppu ripassilennerennai pakkasiwiyeng laherengngE enrengngE topa pakkasiwiyang batengngE iyana hakikinna akkatengngengE, nanigi-nigi lolongengi hakikinna akkatangengngE, iyanaro tau majeppuiwi alena, nanigi-nigi majeppuiwi alena, najeppui tonitu puanna. Iyanaro Najello makkedana anreggurutta pattassaopuE: ……

Bettuanna : Nigi-nigi majeppuiwi alena majeppu majeppui tonitu puanna Naiya ripakkelorie (najeppui alena) iyanaritu najeppuinnai alena nasaba naturusinnai parentana nananiniriwi pappesangkana Puang Allah Taala.

            Jaji taniya ripakkelori papejeppu ri alewe najeppuinnai mula                       ancajingenna koromai pada-padanna rialanai

Ancajingenna pole rialusu’na.

Hal. 7

TanaE, apie, waiye, angingngE iyarega, pada-padanna : wa’di, madzi, mani, manika kuwaetopa ri laennae ritu koromai najeppuinnai tubu kassara’na Adam. Tubu alusu’na Muhammad, nyawana nurun, nurun pole ri puang Allah Taala. EnrengngEtopa rilainnae ritu koromae siagaE egana pappejeppu-“    Sala de’e gaga appengenna cikalice  ri agama asellengengnge, agama nappapolewe    nabitta nade’ abata-batanna sining ane de’e  napapolengekki Nabitta majeppu ritollai ritu.

Makkeddai Nabitta

Bettuanna nigi-nigi papole rilelenna  iye agamata, nadei ritu saisa agama majeppu ritollai ritu. Makkeda toi puang Allah Taala Risurah Ali Imran.

Bettuanna nigi-nigi sappa agama ri laennae agama asellengengnge pura de’naritarima ritu, naengka matti riahera saisa tau rugi

Natattampu’na rilalenna iyaE passalengngE dua tellu masala mewaengngi

Hal. 8

Masala MamulangngE

Tawanna PakkasiangngE

Tattawai pakkasiwiyangngE lao ri duaE tawanna :

1. (Pakkasiwiyang lahereng) iyanaritu pakkasiwiyanna tubuE koromai pada-padanna : SempajangngE, PuasaE, Kuetopa ri lainnaE ritu turu’ pada toha marissengengnge rikkeng.

2. (Pakkasiwiyang Bateng) iyanaritu pakkasiwiyanna atie koromai pada-padanna : parengerangnge tauE ri puang Allah Taala nenniya pesonae, asa’barakengnge, asukkurukengnge kuaetopa rilainnae ritu.

Napura tempedding sisessiseng ripassarang pakkasiwiyang laherengnge napakkasiwiyang batengnge jaji ri makkuannanaro de’tu sewwa pakkasiwiyang lahereng ri pakkasiwiyangeng batangngE pada-padanna : sempajangnge, saisairo pakkasiwiyang lahereng temmakkuller ri passilennereng ritu’ narekko tennasibawaiwi parengerang uppanna-uppanna de’I parengrangnge nallupai toni ritu kedo-kesona baca-bacana sempajangnge.

Jaji mattentuni aderenna nawedding massarang pakkasiwiyang laherengngE napakkasiwiyang batengnge iyakkeppaha saisai anu mashoroE ri sesena homappejeppue ri engkanai parengerangngE, iyanaro poko’na pakkasiwiyangngE iyatona puaseng lise.

Makkedai Puang Allah Taala ri surah Thaha 13

Bettuanna : tettongengi sempajangngE untuk mengerangiko.

Makkeda toi ri Surah Al-An Kabut 45

Bettuanna : Majeppu parengngerangngE ri puangh Allah taala maserro raja naiya puang Allah Taala maisseng iya-iyanna pada mappegauE.

Jaji tungke, pakkasiwiyang de’E nasibawaiwi parengerang saisai pakkasiwiyang lo’bang  rimakkuannanaro napappatuppatukengi puang Allah Taala ri paegai parengerangngE ri alena. Ri makkedanai ri surah Al-Ahzab 41

Bettuanna : E sininna tomateppe-E, pada arengerakko ri puang Allah Taala arengerang maserro ega.

Hal. 10

Mas’ala MaduaE

Pakkasiwiyang Lahereng

Majeppu Puang Allah Taala napancajiwi taue ri maserro kessingnge ancajingeng massuengngeng pole rilanro ala silinajae napake passilennerrengi parentana puamg Allah Taala nenniya tettangi pappesangkana nenniya napake mewai sipa’binru – binru madeceng tettangi mewai sipa’binru-binru maja padanna ripancaji.

Makkedai Puang Allah Taala, ri Surah At-Tin 4.

Bettuanna : Majeppu sitonget-tongenna kipancajiwi tauE ri maserro kessingngE ancajingeng.

Makkedatopi Nabitta Muhammas saw.

Bettuanna : tungke-tungke torijajiangnge ri jajiangi ripakkakkasa alempurengnge.

Jaji nawajiriwi tungke’tungke’tau majeppu mengke’I (pakalebbi’i) ancajingeng makessinna, napakkegunai pakkakkasa’ sukku’na nasaba napakenai passilennerrengi parentana puanna, niniriwi pappesangkana ritu. Nenniya napakenai sipa’binru-binru madeceng padanna ripancaji sare’kuammengi napulabai asalamakeng sukku’E upe’ manennungengngE ri duaE wanua. Nanigi-nigi passiya-siyai ancajingenna nasaba napakenai madorakaiwi Puang Allah Taala, nenniya mewai sipa’binru-binru maja’ padanna ri pancaji, majeppu saisai ritu tomacilaka puppu’, saju pole ri pammasena Puang Allah Taala rilino lettu ri ahera.

Hal. 11

Ponco’na ada puasengnge pakkasiwiyang lahereng iyanaritu : ri pakenai lanro-lanro aleta passilennerrengi parentana Puang Allah Taala nenniya niniriwi larangenna ritu. Kuaetopa ri pakenai ritu mewai sipa’binru-binru maja padatta ri pancaji.

Mas’ala MatelluE

Tawanna Pakkasiwiyang LaherengngE

Tattadai pakkasiwiyang laherengngE lao ri duae tawannu :

I.      Pakkasiwiyang lahereng langsung ri puangnge iyanaritu pakkasiwiyang natungkerie ataE makkasiwiyangi ri puanna nariasenna ritu ibadah koromai pada-padanna sempajangnge kuaetopa rilainnae ritu. Nasaba iyapa nariakkalebaraki massempajang seddiE tau narekko alenapa papolei tempedding siseng ri sulle.

Rimakkuannanaro nariparentaiyang Nabitta Muhammad saw suroi lise’ bolana massempajang rimakkedanai Puang Allah Taala ri lalenna surah Thaha – 132.

Hal. 12

Jaji bennengnge weddingi si sulle tauE massempajang de’ nariparentai Nabitta Muhammad saw suroangi lise’ bolana ritu.

II.     Pakkasiwiyang lahereng punnai anu maditengnge lao ri Puang Allah Taala, iyanaritu sining pakkasiwiyang iyassibalingiE (iyakkonsingiE) ri pallawangetta ikkeng ataE papolei ritu. Nariasenna muamalah pada-padanna : assipa’binru-binrukeng naparentangngE Puang Allah Taala koromai assipa’balukeng, assipangellingeng nenniya assituluttulungengngE kuaetopa ri lainnae ritu makkedai Puang Allah Taala ri surah Al-Maidah – 2.

Bettuanna : sibole-bolemu pada situluttulung ri decengngE nennia tau ri Puang Allah Taala naaja’ lalo musetulut ri dosaE nenniyari assipubalingngE.

Jaji sining assipa’binru-binrukengnge ri pallawangetta maserro sitinajai ri pappong ri decengnge nenniya tau’E ri Puang Allah Taala. Tempedding sisessinseng ri pappong ridosae nenniya ri atalliweng-liwengnge.

Nigi-nigi pappongi assipa’binru-binrukengngE ri pallawangennia masse ri decengngE nenniya tauE iyanatu makkasiwiyangngi assipa’binru-binrukenna.

Mammuara dare nalomoiyakki Puang Allah Taala pada passilennerrengi pakkasiwiyang laherengnge (ibadae nenniya muamalaE) nasibawai asukkukeng naki pada pulabai deceng natampue nenniya appalang mattajattungingngi ritu risesena Puang Allah Taala.

Hal. 13

Masalah MaeppaE

Pakkasiwiyang BatengngE

Namukka engkanai pakkasiwiyang gatengngE pakkasiwiyang mattentunnai atiE. Jaji waji sisengi ri alae majeppu nakkulle ullei paccingiwi nenniya pakkasingiwi atinna nasaba napalisannai nenniya napalainnai ri atinna sining maka rotakiengngi nenniya solangiengngi koromai pada-pada ria. Namusunnai cinnana inafsunna. Nasaba de’ laing napparentang iyaro nafsue sangedinna ja’. Makkedai Puang Allah Taala ri surah Yusuf – 52.

Bettuanna : Majeppu inafsue maraja apparenta ri ja’E.

Jaji nigi-nigi turusiwi cinna inafsunna nagampangennitu papolei rupa-rupanna ja’E koromae akapere kengngE, apasekengngE, amunapekengngE A’udzubillah ri makkuannanaro rimusu nafsue ri makkedanai.

Hal. 14

Bettuanna : Naiya kaminang maserro lebbiE miniseng iyanaritu namusunai tauE nafsunna nenniya cininana.

Sibawa paimeng, Puang Allah Taala, nappesangkangtu ri turusi nafsutta. Gangkanna najancingeng suruga tau canengngi ritu nafsunna. Makkedai Puang Allah Taala ri Surah An-Nazi’at ayat 40

Bettuanna : Naiya tau metauengngi atettongenna Puanna nanapesang kaiwi inafsunna mapelaiwi cinnana majeppu suruga onrong a’dakkarenna.

Jaji pole kuniye ri haddese’E nenniya ri ayaE ri pahang rajanna onronna tau mesuengngi inafsunna namukkauppanna. “ Nacau’ni tauE inafsunna magampanni natettangi rupa-rupanna ja’E malomomoni napapole rupa-rupanna decengnge. Jaji mattentuni ritu atinna ritu mapaccinni nenniya makessinni nauppannua-uppanua makessinni atie makessittonitu tubue.

Makkada Nabitta saw :

………………………………..

Bettuanna : Pada maingekiwi majeppu engka ritubue juku sitekke narekko madecengi madecettonitu iyana nennua tubue, narekko masolangi masotang manettoni iyamanennua tubue, majeppu sitonget-tongenna iyanaritu atie.

Hal. 15

Masa’ala Malimae

Tawannua Pakkasiwiyang Batengnge

Tattawai pakkasiwiyang batengnge lao ri duae tawang :

I.      Pakkasiwiyang batengnge lao ri Puang Allah Taala iyanaritu pakkasiwiyanna atu matterru lao ri Puang Allah Taala de’e nata’buttu ri toripancajie koromai pada-padanna taue pesonae, tentuangnge parengerangnge ri Puang Allah Taala makkedai Puang Allah Taala ri haddese’ kudsie’ :

Bettuanna : Sibawan itu riwettu muengerakku.

II.     Pakkasiwiyang bateng punnai anu maditengnge lettu ri Puang Allah Taala iyanaritu pakkasiwiyanna atie ta’buttue lao ri pancajinna Puang Allah Taala untu’ marengerang neniya pappejeppu ri Puang Allah Taala. Koromai pada-padanna appikkurie ri pancajinna Puang Allah Taala sikira-kira majeppuiwi asewwangenna, apaullena nennia asenna kuaetopa akkelona enrengngetopa ri lainna ritu namuka appikkiri’na atie tempedding lettu ri ale majeppuiwi Puang mappancajie.

Hal. 16

Makkedai Nabitta saw :

Bettuanna : Pada appikkirikko ri toripancajie naaja’ lalo mupikkirikiwi tomappancajie karana majeppunna ritu de’natemmu-temmuiwi pikkiri.

Jaji appikkirie iyapa nariakkasiwiyang ri Puang Allah Taala narekko ri appikkirikengenge ri alengnge sarekuammangi nariala pappejeppu ri Puang Allah Taala ri Surah Ar-Rad ayat 19

Bettuanna : Majeppu sitonget-tongenna iyani mainge’ topunnaie akkaling.

Akkattana ritu iyami ma’gunangi pikkiri’na ri alangnge sikira-kira mappejeppu tongettongeng ri Puangnge topunnai ati maccinnrung pikkiri patuja.

Mas’ala Maennangnge

Assilaingenna Parengerangnge Napikkirie

Saisainna lasengnge ri ajeppui iyanaritu assilaingenna parengerangnge napikkirie nasapa ala massiya-siyannuna sewwae ata mappikkiri’mi nasengi alena marengerang.

Jaji natentuangini alena lettu ri Puanna nasaba perengeranna narigau’ engkana de’natettu nasaba pappikkirimi, dessa narengrang. Jaji sisalani tentuanna nanapegaue atinna iyanaritu appikkirie namettentuni assilaingenna. Pakkasiwiyanna atie nasaba parengerang nenniya pikkiri.

Hal. 17

Aja nala’gattunna ri ajeppuinnai parengerangnge napikkirie kui ri anessainnai pallolongeng tompo’e pole ri atie iyanaritu :

1.      Nawa-nawa : iyanaritu kedo-kedona atie lolongengi sedding sewwa de-epa nattentu.

2.    Kapang : iyanaritu kedona atie lolongengi anu natuntu’e rimunri purana nakira-kira amakkuangenna.

3.    Pikkiri : iyanaritu angelonna atie tuntu-I anu pura ri kira-kirae koromae sining ri lainnae Puang Allah Taala rimunri purana natentuangi amakkuangenna.

4.    Parengerang : iyanaritu arenrengenna atie mangolo ri Puang Allah Taala.

Napole kunige pappejeppu pura ri rampewe tommala passing keruang pattu ri silaingenna parengerangnge napikkirie kuaetopa rilainnae ritu sining rupa-rupanna pallolongeng mompoE ri atie.

Allah swt mammuare bare’ napakkegunai Puang Allah Taala.

Hal. 18

Mas’ala MapituE

Passingkeruang Silasengengnge Asukkukenna Parengerangnge

Lasengi riasukkukenna parengerangnge ri ajeppuinnai dua tellue passingkeruang penting iyanaritu :

1.      PuasengngE parengerang

2.    Napoleie parengerang

3.    Onronna parengerangnge pole ri Puangnge

4.    Onronna parengerangnge pole ri atae

5.    Parengeranna atae ri Puanna

6.    Onro rionroie marengerang

7.    Lalang rionroie marengerang

8.   Lao-laona parengerangnge

9.    Ata’butungenna parengerangnge

10. A’to’do’e ri wettu marengeratta

11.    Anu wajie ri tentuwang masse’

Majeppu iyawe sappuloe seddi passing keruang penting, nigi-nigi majeppuiwi katajangenna pole ri akkalengnge nenniya nakalengnge akorangnge neha’dese’e majeppu sukku’nitu pappejeppunna ri pussengnge parengerang tongettongeng iya rialae alettukung lao ri Puang Sewwae.

Mammuare bare nainringi Puang Allah Taala majeppu madecengi nenniya pahang lempui kuaetopa singkeruang masse’I ritu matti.

Hal. 19

Passingkeruang Mammulangnge

Puasengnge Parengerang

Pura maddiolo denre pappejeppunna puasengnge parengerang ri engkana iyanaritu, arenrengenna asennangenna atie mangelo ri Puang Allah Taala kutogi ri sa’asewwanna iyarenge naipa’ sukku’na iyarekka nariaseng marajana namuka majeppu arenrengenna atie mangolori Puang Allah Taala tempedding siseng nakiyaseng nawa-nawa tempedding to nalolongeng pakkira-kira nenniya tempedding ti nabitta pikkiri. Jaji arenrengeng simata-matani bawang nenniya asennangeng napunnai atie mangolo ri Puang Allah Taala. Aga narimakkuannaro nariaseng (parengerang) makeddai Puang Allah Taala ri Surah Ar-Rad ayat 28.

Bettuanna : Tongettongeng nasaba arenrengenna ri Puang Allah Taala napuarengeng (napuasennangeng) atie.

Jaji tempedding riaseng nawa-nawa pakkira-kira nenniya pikkiri pada-padanna alarapanna : angolonna atie lao ri sa’ asewwannu nasipa’sipa’na Puang Allah Taala kuaena ullena. Mejeppu atie de naullei lolongengi nasaba nawa-nawa nenniya pakkira-kira detto naullei bettui nenniya matemmu temmuiui nasaba pikkiri.

Makeddai : Majeppu pura de’ naullei taue kira-kira Puang Allah Taala sitongettongenna pakkira-kira.

Passingkeruang Maduae

Napolei Parengerang

Majeppu nepoleie parengerang iyanaritu Puang Allah Taala. Apa’benneng atae napolei parengerang de’natakka lupa naiya kiya kajajiyangnge malewe takkalupa naiyapasi narengerang marekko ri werengngi parengerang.

Hal. 20

Jaji tanniya atae mappunnangi parengerangnge mattentuni Puang Allah Taala mappunnangi nenniya napolei parengerang.

Makeddai Puang Allah Taala ri Surah Al-Mudatsir ayat 56

Bettuanna : Pura de’ narengerang atae sangadinna napuelopi Puang Allah Taala.

Rimakkuannanaro Nabitta Muhammad saw tellesangi mellau tulang ri Puang Allah Taala ri pattette parengeranna turu’ pada toha ri hadese’nai :

Bettuanna : E Puang tatulung laloka simate mengerangiki nenniya sukkurukiki enrengngetopa padecengiwi pakkasiwiyangngi ridi.

Jaji ri pahanni majeppu parengerangngi pole kuni ri Puang Allah Taala. Nasaba alenaha Nabitta saw mellau tulung ri Puang Allah Taala sare kuammengi nariwereng parengerang. Jaji mattentuni majeppu parengerangnge polemi ri Puang Allah Taala dessa napole ri atae. Apa benneng atae napolei majeppu Nabittana napolei ritu.

Hal. 21

Passingkeruang Matellue

Onronna Parengerangnge Pole ri Puangnge

Mejeppu parengerangnge saisai pammase maraja, pappenyameng battoa pole ri Puang Allah Taala nalao ri atae nasaba nata’gattungie pammase nenniya pappanyameng de’ nakkulle ri passilennereng nenniya ri papole ritu sangadinna engkapa parengerang. Pada-padanna pakkasiwiyangnge nenniya jama-jamang linoe kuaetopa puasengnge anynyameng-nyamengnge pura tempeddingi ri passilennereng pakkasiwiyangnge, ri papole jama-jamang linoe ri peneddingi anynyameng-nyamengengnge sangadinna engkapa parengerang.

Jaji mattentuni PARENGERANGNGE pamase maraja pole ri Puang Allah Taala. Makkedai Puang Allah Taala ri Surah Al-Baqarah ayat 157.

Bettuanna : Engerangikka uengerang tokko nenniya sukkurukika naaja’ muassakkarika

Namattentuni parengeranna atae ri Puanna de’ napada parengeranna Puangnge ri atae. Majeppu parengeranna atae ri Puanna passompai ri tu naiya tosi parengeranna Puangnge ri atanna, pammasei ritu.

Narimakkuannanaro naparentangi ri sukkuruki nanapesangkangi ri assakkareng. Namattentu pammasewenitu ri sukkuruki tempedding ri assakkareng. Jaji waji’ni ri singkeruang masse’ majeppu parengerange pammase pole ri Puang Allah Taala lao ri atae.

Hal. 22

Passingkeruang Maeppa’e

Onronna Parengerangnge Ri Atae

Majeppu parengerangnge narekko engkani ri atae iyana puaseng ata tongettongeng. Namukka’ tau de’e parengeranna saisai to takkalupa. Naiya to takkalupae de’nakkulle massompa ri Puanna. Namajeppu passompae engkai ritu tanra akkatangeng. Naiyami massompa tau engkae parengeranna. Jaji parengerami massompa. Jaji iyami puaseng ata tongettengeng nauppanna-uppanna de’I parengerangnge ri atae ata bawammi asenna tonniya ada ri amasei de’tona nasilaingeng olo’koloe.

Makkedai Puang Allah Taala ri Surah Al-A’raf ayat 179

Bettuanna : Majeppu ri Pennoiwi ranaka jahannama maserro ega bangsa jing nenniya bangsa tau pada punnai maneng ati nade’ nappahangengi nenniya pada punnai mata nade’ nakkitangengi nenniya pada punnai dauccili nade’ narengkalingangi iyanarekkuaero pada mui olokoloe iyakkeppaha maserro pusapiha naolo koloe iyanarekkuaero to takkalupa (de’ parengerang-parengeranna ri Puanna).

Jaji ri pahangi pole ri iyaewe aya’e ri majeppunna de’ na’guna atie narekko de’nariappahangeng bettuanna de’ nakasiwiyang ri Puang Allah Taala nasaba parengerang kuaetopa ri lainnae ritu. Jaji mattentuni (parengerangngemi ata tongettongeng) nasaba iyami massopa.

Hal. 23

Passingkeruang Malimae

Parengerang Atae Ri Puanna

Majeppu parengeranna atae ri Puanna iyana puaseng passompa tonget-tongeng jaji narekko de’I parengerangnge ri atae takkalupani pur tempeddinnitu napassilennereng sewwae pakkasiwiyang pakkasiwiyang laherettoga iyareka nappakkasiwiyang bateng.

Aga narimakkuannanaro napatuppatukengi Puang Allah Taala ri paegai nenniya ri pattette pakkasiwiyangnge ri alena. Ri makkedai ri Surah Al-Hijr ayat 99.

Bettuanna : Sampai puammu gangka napolimmu tentuang ammatengeng.

Makkedai topi paimeng ri Surah Hud ayat 112.

Bettuanna : Attette’ko padatoha pura ri parentaingekko.

Jaji de’ siseng - siseng nasitinaja atae simata takkalupa mapelaiwi Puanna. Makkedai Puang Allah Taala ri Surah Al-A’raf ayat 205.

Bettuanna : Aja lalo muengka saisa totakkaluppa.

Hal. 24

Jaji nigi – nigi matekakengi massompa (lettu) ri Puanna to takkalupae, tomarenne’e kuaetopa ri lainnae ritu koromai sining tollesangnge akkalenna de’e nattette parengeranna ri Puanna majeppu saisai ritu topusa mannessa-nessa ri muka engkanai matekakangi passingkeruang sisalae tongengnge polewe ri Puang Allah Taala.

Nade’ puaseng anu tonget-tongeng sangadinna anu polewe ri Puang Allah Taala. Makeddai Puang Allah Taala ri Surah Al – Baqarah ayat 147.

Bettuanna : Naiya matungka tonget-tongengnge polewemi ri Puannu, ajana muengka saisa tobata – bata.

Makkeda topi Puang Allah Taala ri Surah Yunus ayat 32.

Bettuanna : De’ rimunrinna tongengnge sangadinna apusammani.

Mamadaini iyaewe katajangengnge ri aralai passinang keruang pettu ri engkanai parengeranna atae ri Puanna iyana puaseng passompa tonget – tongeng.

Hal. 25

Passingkeruang Maennangnge

Onrong Ri Onroie Marengerang

Majeppu onrong sitinajae naonroi marengerang tau purennuangngi annennungenna (attette’na) parengeranna ri puanna iyanaritu tungke’ – tungke’ onrong pura napattentue puang Allah Taala ri lalenna akorang male’bie iyanaritu tellu onrong.

1.      Ri tettongnge

2.    Ri tudattudangnge

3.    Ri liu’ – liu’e

Namukka de’ sewwa tau malino pole ri rekkuaero tellue onrong (gau) sipungeng tuwona lettu ri munri matena. Jaji uppanna – uppanna napannennungenni parengerannari wettu tottottettonna, Joppa-joppana nenniya ri wettu tudattudanna, majeppu temmappettu nitu parengeranna ri Puanna.

Makkedai Puang Allah Taala ri Surah An-Nisa ayt 103.

Bettuanna : Pada engerangi Allah Taala  ri tettottettommu, nenniya ri tudattudammu kuaetopa ri liu-liu’mu.

Jaji nigi-nigi matekakengi engka onrong laing ri lainna onrong pura napattentue Puang Allah Taala majeppu saisani ritu ateka marusa’ pada-padanna tommatekakengengngi iyapa nalettu parengeranna narekko naitai olena kupi ri arasy iyarega kuwi ri wettu massitana sibawa bainena iyarega kuwi riwettu marenne’na kuaetopa ri lainnae ritu koromae siagae egana ateka-teka marusa’ sisalae tongengnge polewe ri Puang Allah Taala de’ abata-batanna atika makkuaero saisa manengi ritu ateka sala, pusamannessa-nessa toppunnaengngi ritu.

Hal. 26

Passingkeruang Mapitue

Laleng Ri Onroie Marengerang

Majeppu punnaiwi arengerangnge ri Puang Allah Taala laleng-laleng mattentu tempedding ri lepperi nigi-nigi leppe’ majeppu pusai.

Nenniya ri pakkelorie laleng arengerangeng ri Puang Allah Taala yanaritu a’damperampe napapolewe atae ri wettu marengeranna padamui engkana napuada lila iyarega namettokeng ati koromai sining baca-baca ma’jjello’e riaseng marajana nenniya sipa’-sipa’ sukku’na Puang Allah Taala pada-pada’na.

Subehanallah, Alhamdulillah, Lailaha Illallah, Allahu Akbar.

Kuaetopa ri lainnae ritu naiyakiya kaminang male’bie namalomo teppa marengerang ri Puang Allah Taala iyanaritu : LAILAHA ILLALLAH.

Makeddai Nabitta Muhammad Saw :

Bettuanna : Naiya kaminang male’bie sikkiri’ iyanaritu (LAILAHA ILLALLAH).

Hal. 27

Gangkanna makedda Nabitta Muhammad saw.

Bettuanna : Nigi-nigi engka pacceppurang adanna ritu LAILAHA ILLALLAH muttamai ri Suruga.

Maka engkamupagaha sai’ lebbi’I nenniya cau’upe’I tau lolongengengngi Suruga ?

Jaji nigi-nigi matekakengi ebgka laleng arengerangeng ri Puang Allah Taala ri lainnae ri anu ma’jello’e ri aseng marajana Puang Allah Taala, yarega nasipa’ sukku’na makkotoparo ri sa’ asewwangenna ritu, majeppu saisai ritu laleng pusa pusatoi tommolaengngi ritu, koromai pada-padana tomolaengngi laleng arengerangeng sa’da ri laleng pattanna anana ri tampu’e iyarega ette’ mula nasa’dangnge ri tampu’e iyarega ette’ mula nasa’dangnge ana mula ri jajiangnge iyarega sa’da tennalippa’e lila pada-padanna barisi’ telluna alipu’e iyanaritu ( A I U) kuaetopa rilainnae ritu siagae egana nappa’guruang tomappattauka salae majeppu rekkuaero saisa manengi ritu passengkeruang marusa’, ateka’, sala, pusa ri lino lebbi-lebbipaha matti ri atiera’ tau malaengngi ritu.

Hal. 28

Passingkeruang Maruae

Lao-laona Parengerangnge Ri Puang Allah Taala

Nasseriwi tungke-tungke tomarengerangnge ri Puang Allah Taala majeppu makkulleingi makkacueriwi batina Nabitta marengerang sarekuammangi naritarima lempu parengeranna ripuangnge napulabai pammasena ritu.

Makkedai Puang Allah Taala ri Surah Al-Ahzab ayat 21.

Bettuanna : Majeppu engka mupunnai ri surona Puang Allah Taala akkacuereng maserro deceng napunnai topurennuangngi Puang Allah Taala nenniya esso rimunrinna nenniya tomangerangnge ri Puang Allah Taalaarengerangnge maega.

Jaji nigi – nigi de’nakkacueriwi Nabitta Muhammad saw majeppu nasajuriwi ritu pammasena Puang Allah Taala nenniya puasai apuasang maraja.

Makkedai Nabitta Muhammad saw :

Bettuanna : Bennengnge mutettangi su’nna’na (lalenua) Nabimmu Majeppu pusako.

Hal. 29

Jaji nigi – nigi marengerang nanapassisalai batena Nabitta Muhammad saw marengerang, majeppu pusai ritu. Namajeppu batena Nabitta Muhammad saw marengerang alena Puang Allah Taala tirowangi ritu ri lalenna akorang male’bie.

Makkedai Puang Allah taala ri Surah Al-A’raf 205.

Bettuanna : Engerangi Puannu Muhammad ri alemu ri gau’engkamu mappakatuna ale nenniya maraja tau’ nenniya de’ muparajai sa’dae ri ele’e nenniya ri arawengnge nenniya aja’ muengka saisa takkalupa.

Jaji pole kuniriyaewe ri pahang pekkogi batena Nabitta Muhammad saw marengerang iyanaritu :

1.      (ripattette’rai atie marengerang ri Puangnge) jaji tempedding siseng ri paleppa’ sala kuaena ri pangolona atie lao ri tajang ri e’bu – e’bue kuaetopa ri lainnae ritu.

2.    Ri passangkanai appakatuna alewe, jaji tempedding sisekki sala kaelo koromai pada-padanna ri a’gappa – gappannai alewe kuaetopa ri lainnae ritu.

3.    Ri parajaiwi tau’e , jaji tempedding sisekki talliwe – liwe’ kuaena, alena naseng Puang riwettu lettu’na parengeranna. Napassabui ri lalenna tajang nae’bu – e’bue kuaetopa rilainnae ritu.

4.    Ri parennikinna sa’dae ri wettu ma’dampe rampeta ri essoe nenniya ri wennie. Jaji tempedding siseng togara – gara, tempedding to ri paleppa’ sala lapalenna sikkiri’e gangkanna de’na kibettuang iyakeppaha padamani tomattutu salae.

Makkedai Puang Allah Taala  ri Surah Al-A’raf 180.

Bettuanna : Tettangi Muhammad saw sining toppaleppe’ – leppe’ salaengngi asenna Puang Allah Taala.

5.    Ri pannennungennai parengerangnge , jaji tempedding sisekki takkaluppa, uppanna – uppanna takkalupaki sibole – boleta mainge marengerang masitta’.

Makkedai Puang Allah Taala ri Surah Al-Kahfi 24.

Bettuanna : Engerangi masitta Puangmmu narekko takkalupako.

Jaji nigi – nigi gaukengiiyaewe cara – cara natiroangnge Puang Allah Taala ri Nabitta Muhammad saw ri wettu marengeranna majeppu naccaerini ritu batena Nabitta marengerang de’ abata – batanna natarima ritu Puang Allah Taala nasibai appurio.

Passingkeruang Maserae

Ata’buttukanna Parengerangnge

Majeppu nata’buttukie parengerang manaritu :

1.      Sa’ asewwanna Puang Allah Taala.

Makkedai Puang Allah Taala ri Surah Al-Baqarah 152

Nanapakkelorie saisanna anreggurutta pattasaopu’e ri makkedanai …………….. engeranga, majelloi ritu ri sa’na Puang Allah Taala.

2.    Sipa’ sukku’na Puang Allah Taala .

Makkedai Puang Allah Taala ri Surah Al-A’raf 205.

Bettuanna : engerangi Puammu.

Namajeppu apuangenna Puang Allah Taala saisai ritu sipa’ sukku’na. Jaji sining sipa’ sukku’na Puang Allah Taala wedding maneng ri pata’buttuni parengerang padatoha aweddingenna ri pata’butturi sipa’ apuangenna.

3.    Aseng marajana Puang Allah Taala.

Makkedai Puang Allah ri Surah Al-Anfal 45.

Bettuanna : engerangi Puang Allah Taala, arengerang maserro maega.

Namajeppu lapaleng jalala …… saisai ritu aseng marajana Puang Allah Taala. Jaji sining asenna Puang Allah Taala wedding maneng ri pata’butturi parengerang. Padatoha aweddingenna ri pata’butturi aseng rialena Puang Allah Taala.

Engka mato saisanna anregurutta pangessulu’e pata’buttui parengeranna riwinrunna Puang Allah Taala nasaba a’detengngana appikiri’e lao ri winrunna gangkanna ta’bettu lao ri Puang Allah Taala.

Makkuniro anessanna ata’buttukenna parengerangnge. Nanigi – nigi pata’buttui parengeranna lao ri lainnae rekkuaero pura ri pampewe, majeppu tassalani ritu atassalang maraja nenniya pusani apusang mannessa – nessa, kuaena, napata’buttuii parengeranna lao ri anu nae’bu – e’bue ri lalenna alena koromai pada-padanna tajang ma’dupa-rupangnge, tanra-tanra (mesaleng-mesaleng) mattentue yarega pada-padanna mappassisabu-sabue kuaetopa makkatenniengngi essei’ Uttamana nappase’na enrengnge topa ri lainnae ritu siagae eganaromai ateka’teka nenniya passingkeruang-passingkeruang napa’guruangnge tamappattareka salae’.

Passingkeruang Maseppuloe

Att’do’e Riwettu Lettu’na Parengeratta

Majeppu saisai anu mappata’gerring kerringnge ri sesena tau marengerangnge ri puanna iyanaritu kapang masse’e nenniya to’do’pulie riwettu lettu’na ri puanna, nasaba ce’de salana kapanna lesse’ni to’do’na masolanni ritu kuaena nakapanni alena atae masse’di ri Puanna ri wettu lettu’na parengeranna gangkanna nasenni de’na ata puangmani simata-mata. Jaji napancaji puang toni alaena atae. Nade’ abata-batanna saisai anu mustarele atae mancaji Puang ri mukka muni lettu tongeng muna atae ripuanna, naijakuja ata matoiha atae puang motoi puangnge.

Nanigi-nigi matekakengi de’ata puammani simata-mata iyarega mancaji puanni atae majeppu kaperei ritu (kiellau allinrungengi ri Puang Allah Taala)

Jaji ri makkuannanaro napatuppatukengi Puang Allah Taala ri haddise’ Qudsie ri pakessingi kapangenge ri alena padatoha ri makkedanai :

Bettuanna : Naiya iya huwa ri kapanna atakku, jaji sibole-bolena lalo makkepang madeceng ri iya.

Jaji waji’ siseng ripadecengi kapangnge ri puangnge tempedding ri pejari. Nasaba Puang Allah Taala kumi ri kapang masse’na atanna monro.

Makkedai paimeng ri haddise’ kudsie :

Bettuanna : iya’ kuwa ri kapang masse’na atakku ri wettu maengngerakku narekko madecengngi kapanna napunnaini ritu decenna narekko maja’i napunnaitoni ritu ja’na.

Jaji mattentu sisenni awajikenna ripadecengi kapangnge nenniya ripakessingi tentuangnge ri wettu marengeratta ri puangnge.

Mammuare bare’ nalomoiyakki Puang Allah Taala pa’dupai ritu sare’kuammangi matasalama’ lempu ri sesena puangnge.

Passingkeruang Maseppuloese’di

Anu Wajie Retentuang Masse’

Majeppu anu wajie tentuang masse’ nenniya ritodo’pettu riwettu to’buttunnana parengerange ri puangnge iyanaritu :

1.      Atettukenna atae ri puanna.

Narekko ta’buttuni parengerangnge (parengeranna atae ri puanna) waji’ni ri tentuang masse’ nenniya ri to’do pettu alettukenna ritu ri puanna de’pallawangenna. Karana benneng engka pallawangenna majeppu de’nanaissengi puangnge etto’na atinna atanna ri wettu marengeranna.

Hal. 35

Makkedai Puang Allah Taala ri Surah Qaf ayat 16 :

Bettuanna : Majeppu sitonget-tongenna kipancajiwi taue nakkiseng namettokengnge atinna ritu. Naiya ikkeng maserro reppekempi ri taue napasseppi bulo tigerro’na.

Namajeppu bulo tigerro’ sideppe’ passeppi’na de’ pallawangenna. Jaji areppekenna atae ri puanna tempeddinni ri kira puangngemani maserro missengi iyanaro napakkelori pattasaopu’e sibawani temmassarang atae napuanna.

Naritunrengina ri makkedai Puang Allah Taala ri Surah Al-Hadid ayat 4 :

Bettuanna : Iyanaritu Puang Allah Taala sibawanatu pego-pego engka.

Jaji alettukenna atae ri puanna de’na assarangenna riwettu tuwona nenniya ri munri matena.

2.    Appassewwanna atae ri Puanna

Narekko lettu’ni parengeranna atae ri puanna ri wettu narampena lilana iyarega atinna “LAILAHA ILLAH LAH” iyarega “ALLAH” tassingkerru’ni ri atinna (engka Puang sewwa) karana majeppuna tapaleng jalala “ALLAH” saisai aseng marajana Puang Allah Taala majello’e ri engkana sa’asewwanna ritu majeppu sipa’ engkae sipa’ nafsiyah napunnai Puang Allah Taala bettuanna : sipa’ ri alena ritu silasengengnge sa’sawwenna padatoha silasengenna sipa’ apuangenna. Jaji tasengtoni tassingkerru ri atie riwettu lettu’na parengerangnge (engka Puang sewwa) bettuanna: engkai Puang sewwae marengerang alenamuto nangerang.

Karana majeppuna parengerang narengerangnge atae polemui ri puangnge.

Aga mawaji’na ritentuang pettu majeppu atae mappassewwani ri puang karana napassidimai parengeranna lao ri puanna nasaba natentuangennai tanniana alena napolei parengerang puannamani simata-mata.

Iyanaro napakkelori anregurutta pattasaupe’e (massidini tennasisowo atae napuanna)

Iyamatoro najello ri makkedanai :

Bettuanna : Naiya tomassompoe nenniya torisompoe se’dimi appongenna ritu :

Bettuanna : Naiya tomassompoe sewwai nenniya torisompae sewwatoi.

Jaji mallaisennai atae napuangnge nasaba nangakuinnai puanna nasaba assompa simata-mata nenniya nangakui sibawa namasainnai ritu nasaba pammase mannennuangeng.

Makkedai Puang Allah Taala ri surah Al-Luqman ayat 22 :

Bettuanna : Nigi-nigi ma’bereangi alena ri Puang Allah Taala rigau’ engkana mappedeceng majeppu makkatenning masse’nitu ri calincing pore bettuanna ri appassewwangnge ri Puanna.

Makkedatopi ri aya’ laingnge ri surah Al-Baqarah ayat 112 :

Bettuanna : Nigi-nigi ma’berengi alena ri Puang Allah Taala rigau’ engkana mappadeceng punnaini ritu appalang risesena puwanna nade’na sewwa tau masseriwi nenniya de’toni mannanro pada masaro.

3.    Onronna atae ri wettu lettu’na ri puanna.

Narekko lettu’ni atae ri puanna waji’ni ritentuang pettu, majeppu ata matoi atae, puang metoi puangnge karana engkana pammase iyanaritu parengerang nakkamaseyangnge puwangnge ri atanna, iyarega suruga matti’ riesso ri monri. Namajeppu silasengngi engkana pammase, engkanato tomakkamase nenniya torimasei namattentu iyami makkamerse puwangnge nasaba alenami napolei parengerang alenatommi makkamaseyangngi matti suruga makadai nabitta saw:

Bettuanna : Naiya parengngerangnge pappenyameng simata pole ri Puang Allah Taala, jaji sibole-bolemu pasilennerengngi sukkurukiwi ritu.

Jaji mattentuni atae toriamasei, nasaba riwerengpi parengngerang narengngerang iyatona matti ripammasei suruga, jaji musfahele’I atae mancaji Puang, padatoha amustahelengenna puang nge mancaji ata aga narimakkuannanaro nakkada Puang Allah Taala ri surah Al-Baqarah ayat 152 :

Bettuanna : Sibole-bolemu sukkuru lao riya’ naaja’ lalo muassakkarengnga akkattana ritu sukkuruki pammaseku iyanaritu parengngerangnge rilino nenniya surugae matti ri akhera. Naaja lalo muassakkarengi.

Nanigi-nigi matekakengngi degaga ata puang mani simata-mata riwettu lettunana atae ri puangna majeppu nasomponitu alena massakkarenni puangna.

Hal. 39

Nade’ abata-batanna kapere’ni ritu akaperekeng manasse-nessa “ALLAH” kipurennui ri puang sewwae muare bare’ nakamaseyangngi apanginrigenna rikkeng makkacoeriwi Nabitta saw. Ri sese lahereng nenniya risse batin, sarekkuammengngi naripulaba asalamakeng sukkue nenniya upe’ mannennungngengnge nilino lettu ri akherat.

SEWWA PAPPESSUKKU’ RILALENG PUASENGNGE

LALENG AMATENG

Majeppu amatengnge saisaritu laleng mattentu naola tungke’-tungke’ makkenyawae rigau engkana peneddingiwi nyamenna iyarega naperrina.

Makkedai Puang Allah Taala ri surah Al-Ankabut ayat 57 :

Bettuanna : Tungke’-tungke’ tasseddiye watakkale napeneddingi maneng amatengnge.

Nanigi-nigi peneddingiwi nyamenna, majeppu  salama’ni amatengenna nenniya maupe’ni lettu ri esso ri munri.

Hal. 40

Nanigi-nigi rasai pai’na majeppu maja’ni amatengenna macilakani lettu ri esso kiame’.

Agana rimakkuannanaro namaserro sitinaja sisenna rituntu’ laleng-laleng ri puasalamakengnge ri amatengnge. Namajeppu sining amala’-amala’ madecengnge nenniya pakkasiwiyangnge ri puangnge saisa manengngi ritu laleng ri puasalamakeng riamatengnge naiyakiya kaminang marippe’e namalomo iyanaritu deceng kapangnge ripuangnge nasibawai tettuang masse’ riwettu rioloinnai amatengnge iyare’ga rilaleng adangnge.

Rimakkuannanaro napatu-patukengngi Nabitta saw ripakessingi kapangnge ri Puang Allah Taala riolo temmateta’ turung pada toha rimakkadanai :

Bettuanna : Ajalalo namate salasewwamme sangadinna makessippi kapanna ri Puang Allah Taala.

Napura tempeddingngi irulle pokessingi kapangnge ru Puang Allah Taala ri wettu rioloinnai amatengnge (Rilaleng adangnge) narekko tenri pubbiasa memengngi ritu riwettu mawatatta mupa nenniya masagenna mupa wettu kipunnai. Nasaba rilaleng adangnge dena akkelo ri alena atae iyarega teppa nakeloki amatengnge polei tenrisa’na-sa’na.

Jaji rimakkuannanaro namaserro sitinaja siseng ri pabbiasa alewe riamatengnge.

Makkedai Nabitta saw :

Battuanna : Pada matememekko ri yolo temmatemu.

Akkatana ritu : pada pabbiasai alemu ri amatengnge iyanaritu amateng baiccu’e tennapoleimmu mupa amateng loppoe.

Naiya ripakkeloriye amatengnge baiccu maserro sitinajae riomroi pa’beasai aleta moloiwi amatengnge loppoe iyanaritu tinroe.

Makkedai Nabitta saw :

Bettuanna : Naiya tinro anrinnai amatengnge.

Rimuka majeppu tomatinroe messu’I rohaninna (sumange’na) padatoha messu’na nyawana tau mate ri makkuannanaro jaji nasserini tolo’e matinro pauju lempu’e alena nasaba napaegainnai toba’e nenniya salawa’e onco’pasiha sikkiri’e gangkanna matinro lettei parengeranna ri puangnge gangkanna matinro.

Narekko naulleni pannennungengi gangkanna mancaji abiasang ri alena simata marengerangnge gangka matinrona majeppu malomoni napapole matti parengerangnge ri wettu lo’na mate. Karana alenana puangnge mamaseiwi ri mukka puranai nakkaresongi ri wettu mawatanna nenniya ri wettu lo’na matinro.

Makkedai Nabitta saw :

Bettuanna : Matei taue ri anu napubiasangnge ri wettu tuwona.

Jaji narekko napubiasa memenni atae simata paegaiwi a’dampe rampena nenniya pattette’i parengeranna ri puanna ri wettu mawatanna mupa engkana mupa pakkullena naoncoppasiha narekko simata napa’biasani alena riwettu lo’na matinro de’ abatabatangenna malomoni amatengnge ri sesena.

Makkuniro rippe’na puasengnge Nabitta saw. Jaji nigi-nigi me’bu laleng-laleng kamateng sisalae natiroangnge Nabitta saw majeppu saisai ritu laleng kamateng pusa pusato tommalaengngi ritu. Koromai pada-padanna akkita-kitangnge iyarega attajengnge tanra-tanra mattentu iyarega messu pole ri alena naiyana napattetteki parengeranna nasibawai tentuang masse’ gangkanna messu nyawana (matena) kuaetopa rilainnae ritu siagae egana koromae laleng-laleng kamateng  morissengengnge ri sesena tomattareka-tareka salae iya de’e ritu situru natiroangnge Nabitta saw de’ abatabatangenna engkanai ritu apuasang mannessa-nessa.

“ALLAH” kipada mellaui ri Puang Allah Taala pada bare nalitutui laloki pole ri gau’-gau’ apusangnge ri lalenna atuwo-tuwong linole lebbi-lebbipaha atuwongnge matti ti ahera…………………………………………….

Napole kuniye ri pa’gangka iyaewe karangeng maponco’e (marippe’e) namalampu’ narigau’ engkaku mappurennu ri puang patiroangnge namaraja akkamase sare’kuammengi napakkegunai ritu risining totuntu’engngi puasengnge appasewwang nenniya appejeppu ri puangnge nenniya totuntuengngi lalellaleng kamateng napulabai asalamakeng sukku’e nenniya pammase mannenungengnge rilino enrengngetopa matti ri ahera.